చంటి ఛానల్,బోధన్: పట్టణంలోని శ్రీ ఏకచక్రేశ్వర శివాలయం మహా శివరాత్రి పర్వదినాన్ని పురస్కరించుకుని భక్తజన సంద్రమైంది. త్యాగానికి, వైరాగ్యానికి రూపమైన పరమేశ్వరుడిని దర్శించుకునేందుకు భక్తులు తెల్లవారుజాము నుంచే పోటెత్తడంతో ఆలయ ప్రాంగణం “ఓం నమః శివాయ” నామస్మరణతో మారుమోగిపోయింది. ఆలయ ఈవో రాములు పర్యవేక్షణలో భక్తులకు ఎలాంటి ఇబ్బందులు కలగకుండా తాగునీరు, ప్రత్యేక క్యూ లైన్లు మరియు వైద్య సదుపాయాలను పకడ్బందీగా ఏర్పాటు చేశారు. ఆలయ అర్చకులు గణేష్ శర్మ, మహేష్, శివ తదితరుల ఆధ్వర్యంలో శివుడికి శాస్త్రోక్తంగా అభిషేకాలు, రుద్రాభిషేకాలు, లింగార్చనలు నిర్వహించబడుతున్నాయి. అజ్ఞానాన్ని తొలగించి జ్ఞాన వెలుగులు నింపే ఈ పవిత్ర రాత్రి జాగరణ, ఉపవాసాలతో శివుని కృప లభిస్తుందని భక్తుల నమ్మకం. ఎటువంటి అవాంఛనీయ సంఘటనలు జరగకుండా ఏసీపి శ్రీనివాస్ నేతృత్వంలో గట్టి పోలీస్ బందోబస్తు నడుమ వేడుకలు అత్యంత భక్తిశ్రద్ధలతో కొనసాగుతున్నాయి.
