చంటి ఛానల్,బోధన్: పట్టణంలోని ఇందూరు హైస్కూల్‌లో విద్యార్థులకు రహదారి నిబంధనలపై అవగాహన కల్పించేందుకు ప్రత్యేక కార్యక్రమాన్ని నిర్వహించారు. ఈ కార్యక్రమానికి జిల్లా రవాణా అధికారి (DTO) ఉమామహేశ్వరరావు ముఖ్య అతిథిగా హాజరై, సుమారు 1000 మంది విద్యార్థులకు ట్రాఫిక్ నియమాలు, హెల్మెట్ ధరించడం, అతివేగం వల్ల కలిగే ప్రమాదాల గురించి వివరించారు. చిన్న వయస్సు నుంచే క్రమశిక్షణతో కూడిన డ్రైవింగ్ అలవాట్లను పెంపొందించుకోవాలని, ప్రతి విద్యార్థి తమ కుటుంబ సభ్యులకు రహదారి భద్రతపై అవగాహన కల్పించాలని ఆయన పిలుపునిచ్చారు. పాఠశాల ప్రిన్సిపల్ కిషోర్, ఉపాధ్యాయులు పాల్గొన్న ఈ సదస్సు విద్యార్థుల ఉత్సాహభరిత భాగస్వామ్యంతో విజయవంతమైంది.
