చంటి ఛానల్,నిజామాబాద్: నిజామాబాద్ జిల్లా బోధన్ మండలంలోని బెల్లాల్ గ్రామం ఇప్పుడు దేనిలో వెనకబడిందో లేదో కానీ, ‘బెల్ట్ షాపుల’ ఏర్పాటులో మాత్రం అద్భుతమైన అభివృద్ధిని సాధిస్తోంది! వీధికో షాపు చొప్పున ఇంత చిన్న ఊళ్లో ఏకంగా 8 బెల్ట్ షాపులు తెరిచి మద్యాన్ని‘బెల్లాల్ నీళ్లలా పారిస్తుంటే‘, మన ఎక్సైజ్ అధికారులు మాత్రం కళ్లకు గంతలు కట్టుకుని ‘చూసీ చూడనట్లు’ అద్భుతంగా నటిస్తున్నారని గ్రామ మహిళలు మండిపడుతున్నారు..
ఈ మందుబాబుల ఆగడాలు, అధికారుల నిర్లక్ష్యం భరించలేక మంగళవారం ఎక్సైజ్ ఆఫీసును ముట్టడిస్తే.. “మేము ఆఫీసులో ఉన్నామంటే, మేము మీ ఊళ్లో ఉన్నాం” అంటూ అధికారులు భలే కవర్ డ్రైవ్‌లు ఆడుతున్నారని మహిళలు ఆరోపిస్తున్నారు..
బోధన్ మొత్తానికి నీళ్లందించే ప్రసిద్ధ ‘బెల్లాల్ చెరువు’ ఉన్న ఈ ఊరిలో, పరిస్థితి ఇలాగే కొనసాగితే రేపొద్దున ఆ చెరువులో నీళ్లకు బదులు ‘స్వచ్ఛమైన మద్యం’ పారుతుందేమో అని స్థానికులు, మేధావులు తమ అభిప్రాయాన్ని వ్యక్తం చేశారు..
తమ బతుకులను రోడ్డున పడేస్తున్న ఈ ఎనిమిది బెల్ట్ షాపులను తక్షణమే మూసివేయాలని మహిళలు మొత్తుకుంటున్నా, ఈ ‘మద్యం పారే’ వింత గ్రామ వికాసాన్ని ఆపే నాథుడే కరువయ్యాడని ప్రజలు వాపోతున్నారు!
