చంటి ఛానల్, హైదరాబాద్: తెలంగాణ సాంస్కృతిక నిలయం రవీంద్రభారతి వేదికగా గురువారం సాలూర మండల రైతన్న ఇల్తెపు గంగారాం (KG) కీర్తి కిరీటంలో మరో అరుదైన మైలురాయి చేరింది. వైద్యుల గ్లోబల్ ఫౌండేషన్, వసుంధర విజ్ఞాన వికాస మండలి సంయుక్తంగా నిర్వహించిన జాతీయ అవార్డుల ప్రదానోత్సవంలో గంగారాం తన అలుపెరగని కృషికి గానూ అత్యున్నతమైన ‘పుడమిపుత్ర’ జాతీయ అవార్డును కైవసం చేసుకున్నారు. రామగుండం మాజీ ఎమ్మెల్యే కోరుకంటి చందర్ చేతుల మీదుగా ఈ పురస్కారాన్ని అందుకుంటున్న తరుణంలో సభాప్రాంగణం చప్పట్లతో మారుమోగింది. మట్టిని నమ్ముకున్న రైతుకు దక్కిన ఈ గౌరవం సాలూర ప్రాంతానికే గర్వకారణంగా నిలిచింది. ఈ వేడుకలో సంస్థ వ్యవస్థాపకులు మధుకర్ వైద్యుల, కోశాధికారి సుమలత, కార్యదర్శి లింబూరి లక్ష్మణ్ తదితర ప్రముఖులు పాల్గొని, గంగారాం వంటి ఆదర్శప్రాయులైన వ్యక్తులను సత్కరించుకోవడం సమాజానికి స్ఫూర్తిదాయకమని కొనియాడారు.
