చంటి ఛానల్, బోధన్: మున్సిపల్ చైర్మన్ కుర్చీ దక్కించుకునేందుకు కాంగ్రెస్ పార్టీలో అంతర్గత పోరు తారస్థాయికి చేరింది. ప్రధానంగా ముగ్గురు అభ్యర్థులు “నాకంటే నాకు” అంటూ పట్టుబడుతుండటంతో పార్టీలో గందరగోళం నెలకొంది. ఇక్కడ సీనియార్టీకి ప్రాధాన్యత ఇవ్వాలా లేక కొత్తగా గెలిచిన జూనియర్లకు అవకాశం ఇవ్వాలా అన్నది చర్చనీయాంశంగా మారింది. “పార్టీ విజయంలో మాదే కీలక పాత్ర” అని కొందరు నాయకులు వాదిస్తుండగా, “కష్టకాలంలో పార్టీని వీడకుండా అహర్నిశలు శ్రమించిన మాకే కుర్చీ దక్కాలి” అని మరికొందరు పట్టుబడుతున్నారు. ఈ నేపథ్యంలో అసమ్మతి సెగలు పెరగకుండా ఉండేందుకు పార్టీ అధిష్టానం గెలిచిన అభ్యర్థులందరినీ వెంటనే హైదరాబాద్‌కు రప్పించింది. ప్రస్తుతం అందరి కళ్ళు ‘పెద్దాయన’ నిర్ణయంపైనే ఉన్నాయి; ఆయన ఎవరి పేరును ఖరారు చేస్తారో అన్న ఉత్కంఠ సర్వత్రా నెలకొంది.
